കണ്ണൂർ / കണ്ണൂർ നഗരത്തിലെ പയ്യാമ്പലം റോഡിൽഹോട്ടലിന്റെ മുൻവശത്തെ വാതിൽ കുത്തി തുറന്ന് അകത്ത് കടന്ന മോഷ്ടാവ് കാഷ് കൗണ്ടറിൽ സൂക്ഷിച്ച ഒരു ലക്ഷത്തിരണ്ടായിരം രൂപ കവർന്നുവെന്ന പരാതിയിൽ കണ്ണൂർടൗൺ പോലീസ് കേസെടുത്തു പയ്യാമ്പലം റെഡ് ക്രോസ് റോഡിലെ വൈൽഡ് കഫെയിലാണ് മോഷണം. ഇന്നലെ രാവിലെയാണ് മോഷണം നടന്നതായി വ്യക്തമായത്.
തുടർന്ന് ജീവനക്കാരൻ നാറാത്ത് നിടുവത്ത് സ്വദേശി കെ. ടി. റഫീഖ് ടൗൺ പോലീസിൽ പരാതിനൽകി. കേസെടുത്ത പോലീസ് അന്വേഷണം തുടങ്ങി. ഫോറൻസിക് വിഭാഗവും വിരലടയാള വിദഗ്ദ്ധരും സ്ഥലത്തെത്തി അന്വേഷണം നടത്തി. മുൻ വശത്തെ വാതിൽ തകർത്ത് അകത്ത് കയറിയ മോഷ്ടാവ് കാഷ് കൗണ്ടറും ടിപ് ബോക്സും തകർത്താണ് ഒരു ലക്ഷത്തി രണ്ടായിരം രൂപ കവർന്നത്.
പുറക് വശത്തുണ്ടായിരുന്ന തൂമ്പ ഉപയോഗിച്ചു വാതിൽ തകർക്കുന്നതും മോഷണം നടത്തിയതിനു ശേഷം തിരിച്ചു പോകുന്നതും സിസിടിവി ദൃശ്യങ്ങളിൽ വ്യക്തമാണ്. കഴിഞ്ഞ മാസം 29 നും മോഷ്ടാവ് ഇവിടെ കയറി കാൽ ലക്ഷം രൂപയോളം കവർന്നിരുന്നു. ഒരേയാൾ തന്നെയാണ് മോഷണത്തിന് പിന്നിലെന്ന് സിസിടിവി ദൃശ്യത്തിൽ നിന്നും വ്യക്തമാണെന്ന് പൊലിസ് പറഞ്ഞു.
ഇതിന് പുറമേ കണ്ണൂർ പ്രസ് ക്ളബ്ബ് റോഡിലെ ഏഴു കടകളിൽ മോഷണം നടന്നിരുന്നു. ഒന്നേ കാൽ ലക്ഷം രൂപയും വിലപിടിപ്പുള്ള സാധനങ്ങളുമാണ് ഇവിടെ നിന്നും നഷ്ടമായത്.
Advertisement
